Ogen : 1 Korinti 15:3-11
Tema : “Lias ate Dibata erdahin ibas aku”
Tujun :
-
Gelah ngawan perpulungen meteh kerna
kematen res kekeken Jesus eme sura-sura Dibata engkelengi manusia.
-
Keleng ate Dibata erbanca perpulungen
megegeh erdahin nehken singena ateNa.
I.
Kata
Perlebe
Lit sada ungkapan “Allah adalah Kasih, bila tidak
kasih berarti bukan Allah”. Kekelengen Dibata e ibuktikenNa arah rencana
keselamatan situhu teridah arah Jesus Kristus. Jesus Kristus reh ku doni enda
guna menyelamatken kerina manusia. Sada ayat ibas Johanes 3:16 “Sabab bage
pengkelengi Dibata doni enda, e maka iberekenNa AnakNa Sitonggal, gelah ola
bene isie pe si tek man Bana, tapi gelah dat kegeluhen si tuhu-tuhu si la
erkeri-kerin”. Dosa-dosa kerina manusia nggo itebus Jesus Kristus gelah kerina
manusia datken kegeluhen si tuhu-tuhu. Maka tek kita, alu kiniteken sipaguh,
ibas kita dalani kegeluhen e, Dibata pasti menyertai kegeluhenta. E sada bentuk
pengarapenta selaku kalak Kristen. Amin gia kita erdalan arah kelbung si gelap,
la kita mbiar jumpa cilaka sabap Dibata kap ras kita (Lih. Msm 23:4). Genduari
lit sada penungkunen man banta kita kerina, nggo kin sigejapken lias ate Dibata
e ibas kegeluhenta?
II.
Penjelasan
Nats
Surat 1 Korinti enda berisikan pandangan-pandangan
Rasul Paulus, termasuk pandangan Paulus kerna persoalan-persoalan si terjadi
ibas perpulungen i kota Korinti. Ras sada ungkapan si menarik iungkapken Rasul
Paulus maka kasih (kekelengen) emekap pemere Dibata (karunia) si terutama
asangken sidebanna (lih. 1 Kor. 13:1-3).
Ibas ayat 3-4 Rasul Paulus nuriken kerna karya
penyelamatan silakoken Dibata arah Jesus Kristus man kerina manusia. Kerina
manusia enggo erdosa ras ibas kegeluhenna sitep-tep wari pasti erbahan dosa,
tapi erkiteken keleng ate Dibata, kita kerina manusia itebus Dibata. Karya
Jesus enda tuhu-tuhu terjadi ibas sejarah doni enda. Kisah kematen ras kekeken
Jesus enda labo cerita fiksi, dogeng atau motis. Sebagai sebuah catatan
sejarah, segi kesejarahan kisah kematen ras kekeken Tuhan Jesus enda nyata alu
bukti-bukti sejarah si tertulis ibas Pustaka Si Badia, salah sadana iungkapken
Rasul Paulus ibas ayat 5-8. Kisah ras karya Jesus enda pe enggo ipadanken
Dibata ibas Padan si Ndekah (Lih. Jes. 7:14; Mal. 3:1, Jes. 53:5,11; Jes. 53:9;
Msm. 16:10; Msm. 68:19).
Ayat 9-11 nuriken kerna penggejapen Rasul Paulus
siberkaitan ras tugas pelayanenna ras statusna selaku rasul (serayan Dibata).
Isadarina kuga sedekah enda ia sope dega idilo Dibata ia jadi sekalak rasul
(serayan), eme sekalak pedosa, si la metunggung igelari rasul (man perpulungen
Epesus pe pernah iungkapkenna kerna si e; lih. Ep. 2:1-3). Tapi tek Paulus,
bagi ikatakenna ibas ayat 10, erkiteken lias ate Dibata ras igejapkenna lias
ate Dibata e labo sia-sia. Lias ate Dibata e si jadiken Rasul Paulus menjadi sosok
si enggo implimbarui Dibata.
III.
Refleksi
Sada hal si perlu irenungken kita, ibas kita dalani
kegeluhenta si tep-tep wari, enggo kin sigejapken lias ate Dibata e?. Sebab adi
sisungkun kerna lias ate Dibata e erdahin ntah lang ibas kegeluhenta, secara kinitiken
erpalasken kesaksin ibas Pustaka si Badia nari, lias ate Dibata e pasti erdahin
ibas kita. Arah kematen ras kekeken Jesus Kristus e sada rencana si enggo
iaturken Dibata guna engkelengi kerina manusia. Sada kepastian man banta maka
lias ate Dibata e erdahin ibas kita, lit janji Jesus kerna sada penampat guna
nampati kita, eme Kesah si Badia (Joh. 16:7-11). Enda sada bentuk pasti kerna
lias ate Dibata enda nandangi manusia.
Arah si enda, mari kita selaku kalak sierkiniteken,
si ngejapken lias ate Dibata e, ibas paksa senang ntah paksa berat, teridah min
arah kegeluhenta kuga kin kalak si enggo ngaloken ras ngejapken lias ate Dibata
e. Dibata arah keleng atena e, enda ka sinampati kita raduken kerina
perpulungen megegeh erdahin nehken singena ateNa, nampati kita dalani kegeluhen
si pasti lit tantangan-tantangan. Tapi amin gia melala tantangan-tantangan
teklah kita maka Dibata pasti nampati kita sebap lias ate Dibata erdahin ibas
kita.
chrisnov mulyanta tarigan
GBKP Bumi Anggrek
chrisnov mulyanta tarigan
GBKP Bumi Anggrek
