Bahan PJJ GBKP 26 April - 2 Mei 2015 (Ngerencanaken Perbeliten ras Masa Depan bas Jabu alu Payo)

Ogen   : Kejadin 41:53-57

Tema  : “Ngerencanaken Perbeliten ras Masa Depan bas Jabu alu Payo”

Tujun   :

-          Gelah ngawan ni perpulungen ngasup ngaturken perbeliten jabuna alu payo

-          Gelah ngawan ni perpulungen ngerencanaken masa depan kegeluhen jabuna

“Perencanaan” ibas kegeluhenta seh kel pentingna. Ibas kita ersura erbahan sada usaha, sada faktor si erbahansa maka usahata enda banci sukses emekap “perencanaan”. Bagepe ibas ngaturken perbeliten ibas jabu, arus jelas perencanaanna, ibas si enda  pe arus jelas apai sijadi skala prioritas ras apai si labo jadi skala prioritas. Adi ibas jabu, lit piga-piga hal si jadi skala prioritasta, emekap: sandang, pangan ras papan (wajib) ras tambahanna si cukup penting ibas jaman genduari emekap pendidikan terkhusus man anak-anakta. Selaku kalak sierkiniteken, kita pe ituntut erbahan perencanaan ibas perbeliten bagepe masa depan jabu sue ras singena ate Dibata. Ibas kita erbahan sada perencanaan ula kita lupa tetap erkemalangen ras erpengendes man Dibata saja. Sebab ibas Kuan-kuanen lit tersurat: “Erkemalangenlah man Tuhan, gelah terang wari-warindu si pepagi, dingen pengarapenndu pe la bene” (lih. Kua. 23:17-18).

Jusup eme sekalak si pentar ibas erbahan perencanaan, ibas ia kuasa Dibata erdahin. Kuasa Dibata si erdahin ibas ia teridah arah Jusup ngasup ngertiken nipi Raja Mesir alu pengertin maka ibas Mesir terjadi 7 tahun paksa si mehumur ras 7 tahun paksa kelihen (Kej. 41:25-32).  Dungna Raja Mesir ngangkat Jusup jadi Wakil Raja Mesir (Kej. 41:37-43). Jusup datken sada jabatan si mejile tapi ia la lupa kerna tanggungjawabna, lit istilah: dimana ada jabatan besar dibelakangnya mengikuti tanggungjawab yang besar juga. Jusup pe mempersiapken bangsa Mesir ibas ngadapi 7 tahun paksa mehumur ras 7 tahun paksa kelihen. Kai silakoken Jusup? Enda jadi perenungen PJJ enda ibas Kejadin 41:53-57. Ibas Kejadin 41:53-57, enda sada bentuk perencanaan siibahan Jusup. Mengatur keadaan pangan bangsa Mesir, ibas 7 tahun paksa mehumur, ipepulung Jusup kerina pangan, tamakenna bas lumbung tep-tep kuta i Mesir. Rencana Jusup enda banci menyelamatkan kerina bangsa Mesir bahkan bangsa-bangsa i sekitar Mesir.

Arah cerita Jusup enda, ngingatken kita pentingna erbahan perencanaan simatang ibas kegeluhenta, termasuk ibas perbeliten jabu. Perencanaan-perencanaan enda seh kel pentingna guna masa depan jabuta kerina, termasuk ibas masa depan anak-anakta. Hal sipenting siperlu ingat kita ibas erbahan perencanaan-perencaan enda: secara Etika Kristen, semua hal yang akan kita lakukan harus sesuai dengan kehendak Tuhan tidak bertentangan dengan Firman Tuhan. Cara dan tujuannya harus benar. Ibas sienda pe ula lupa kita tetap erpengendes man Dibata sebab Dibata si banci nampati kita kerina, Endesken dirindu man TUHAN , ernalemlah man baNa, tentu isampatiNa kam (Msm. 37:5).

Chrisnov Mulyanta Tarigan Sibero

GBKP Bumi Anggrek Bekasi