Bahan Pekan Kebaktin Penatalayanen GBKP 2017 Wari IV

Bahan Pekan Kebaktin Penatalayanen GBKP 2017 Wari IV

Invocatio         : Kej. 7:1

Ogen               : Kej. 19:12-22

Renungen        : Msm. 128:1-6

Tema               :  Aron Dibata si Muat Bagin I bas Jabu ras Sangkep Nggeluh

Kalak si erkemalangan man Tuhan, kegeluhenna jadi sira ras terang, erguna man sekelewetna. Subuk ibas jelma sinterem, keluarga ras sangkep nggeluh. Arah si e, labo ia saja si muat bagin ibas dahin Tuhan, tapi dungna keluarga ras sangkep nggeluhna pe ikut muat bagin ibas dahin Tuhan.

Penting ibas kegeluhenta, subuk dirinta, keluarga ras sangkep nggeluhta; ersada arih, ersada semangatna, ras ersada motivasina eme muat bagin ibas dahin Tuhan, jadi aron Dibata. Emaka lit kerjasama si mehuli salaku kita aron Dibata. Adi kerina muat bagin ras lit kerjasama si mehuli pasti pelayanan ras dahin Dibata e banci alu maksimal si dalanken.

Nuah ras Lut tuhu-tuhu penting akapna kerna kiniteken sekalak-sekalak anggota jabuna (Kej. 7:1; 19:12-22). Peranna selaku imam ibas jabu i maksimalkenna. Ibas cerita Lut, calon kelana pe ipersingetina alu mesangat. Enda bukti, tuhu-tuhu penting jabu ras sangkep nggeluh. Mari simaksimalken peranta selaku anggota jabu (Mamre jadi imam si ertanggungjawab, Moria bagi Kuan-kuanen 31, PERMATA/ KAKR: igetna pedah pe-lima-ken).

Ibas Masmur 128:1-6 e pe tetep ipersingetina kita gelah jadi kalak si malang man Tuhan. Masing-masing anggota jabu, ingetna penting erkemalangan man Tuhan. Maka, adi masing-masing kita jadi kalak sierkemalangan man Tuhan pasti jabu ras sangkep nggeluhta jadi anggur si meramis ras tunas batang saitun; jadi sira ras terang si tetap muat bagin ersada jadi aron Dibata. Amin…

Cl. Pdt. Chrisnov Mulyanta Tarigan Sibero

GBKP Rg. Pancur Batu

0853-6233-4448