Bahan Sermon PJJ 19-25 Februari 2017 (Dibata Si Kutandai)

Bahan Sermon PJJ 19-25 Februari 2017

Dibata Si Kutandai

Johanes 4:21-26, 34

Alu perjumpanna ras Jesus, terjadi perubahan bas diberu Samaria 180⁰. Perubahan enda mengarah ku pemahaman (pengenalan nandangi Dibata) ras kiniteken si mbaru. Ikataken Jesus maka nterem kalak Samaria situhuna la ietehna ise si isembahna. Enda terjadi erkiteken percampuran. Percampuran ibas budaya, sosial ras kepercayaan. Kenca ngerana Jesus man diberu Samaria maka situhuna enggo seh paksana datkenna sada pemahaman (pengenalan nandangi Dibata) ras kiniteken si mbaru; eme tek maka Mesias si ipadanken Dibata si igelari Kristus reh me; ras Jesus e me Mesias si ipadanken Dibata. Pemahaman ras kiniteken si mbaru enda terjadi erkiteken perjumpan ras Jesus.

Pengenalan si mbaru nandangi Dibata terjadi erkiteken perjumpan ras Kristus erbahanca maka kerina kalak si tek, nembah man Dibata arah kuasa Kesah Si Badia. Lanai kita nembah man Dibata erkiteken seremonial, rutinitas ntah keterpaksaan, tapi tuhu-tuhu erkiteken pengenalan si mbaru, tuhu-tuhu erkiteken panggilan, tuhu-tuhu erkiteken kesadaran ras tuhu-tuhu erkiteken kuasa Kesah Si Badia. Maka guna banci nandai Dibata ras ersembah man baNa alu benar, e me arah Jesus Kristus ras Kesah Si Badia. Lalit dalan sedeban.

Diberu Samaria mewakili dirita genduari, lit keterbatasan ras kekurangan. Kita sekalu manusia tuhu melala kelemahan, sebap kita labo sempurna. Alu kesadaren enda, perlu si bangun hubungen/ relasi ras Jesus. Relasi ras Jesus merupaken sada proses guna nandai Dibata. Pengarapenta ibas nandai Dibata labo saja terjeng pemeteh tapi seh ku tahap “biak Dibata lit bas aku”. Ertina, sitandai Dibata alu benar, teridah arah kegeluhenta. Perukuren, pengerana ras perbahanenta arus mencerminken biak-biak Dibata.

Kita mungkin mengidolakan tokoh-tokoh tertentu: cth. Soekarno, Habibie, Ahok, Ridwan Kamil, Ganjar Pranowo, rsd. Ibas kita mengidolakan tokoh-tokoh enda mengati terjeng mengangumi, tapi la si usih. Arusna, adi si idolaken tokoh enda erkiteken ia anti korupsi, maka kita pe nggit ngusih ia; kita pe anti korupsi. Arusna pe ibas kita nandai Dibata, sibagenda lit bas kita. Dibata sitandai kita perkeleng, maka kita pe nggeluh ibas kekelengen. E sijadi pengarepenta ibas bahan PJJ Minggu enda. Kesah Si Badia sinampati kita.

Cl. Pdt. Chrisnov Mulyanta Tarigan Sibero
GBKP Rg. Pancur Batu - 085362334448